आईएएस अधिकारी वंशीधर तिवारी तै उल्लेखनीय प्रशासनिक सेवा खातिर मिली गढ़भूमि सम्मान-2022
धूमधाम से मनये ग्यायी सामुदायिक रेडियो हेंवलवाणी 21वां स्थापना दिवस समारोह
देहरादून। सामुदायिक रेडियो हेंवलवाणी 21 स्थापना दिवस समारोह चंबा मा धूमधाम से मनये ग्यायी। कार्यक्रम पंवाण कैबिनेट मंत्री सुबोध उनियाल, टिहरी विधायक किशोर उपाध्याय, प्रताप नगर विधायक विक्रम नेगी,पद्मश्री कल्याण सिंह रावत, समाजसेवी अर अधिवक्ता संजय शर्मा दरमोडा न द्यू बाळी कन करी। ये मौका पर विभिन्न अलग अलग जगह उल्लेखनीय काम कन व्हाळ वाली पांच सलिल्यूं तै सम्मानित करे ग्यायी। कला अर संस्कृति संरक्षण क्षेत्र मा लोक गितांग मीना राणा, उल्लेखनीय प्रशासनिक कार्य क्षेत्र मा आईएएस वंशीधर तिवारी महानिदेशक सूचना अर शिक्षा, पत्रकारिता कुणी जगमोहन रौतेला, शिक्षा अर समाज सेवा बाबत हुकुम सिंह ओनिआल, शिल्पकार सर्वजीत खत्री तै गढ़भूमि सम्मान-2022 से समान्नित करे ग्यायी।
ये मौका पर लोकगीतांग पदम गुसाईं, रवि गुसाईं उंक दगड़यों न गढ़वन्दना खोळी क गणेश मोरी क नरैण से सांस्कृतिक कार्यक्रम की पवांण लगायी। लोक गीतवार मीना राणा अर सौरव मैठाणी अपर गीतू भौणं की शानदार प्रस्तुती द्यायी। ये दगड़ी सुणदरौं सम्मान अर स्कूलया नौन्याळू न लोक नृत्य प्रतियोगिता मा भाग ल्यायी जैमों मॉडर्न स्कूल न पैल स्थान पायी अर दूसर स्थान बालिका इंटर कॉलेज चंबा अर तीसरा स्थान मॉडर्न स्कूल एकेडमी न पायी, जौं तैं ट्रॉफी अर पुरस्कार देकन सम्मानित करे ग्यायी।
ये मौका पर कैबिनेट मंत्री सुबोध उनियाल न ब्वाल सामुदायिक रेडियो हेंवलवाणी स्थानीय बोली भाषा क एक मजबूत अर प्रभावी मीडिया माध्यम च उ जल्द ही स्टेशन भवन बाबत मुख्यमंत्री से बात करल । जमीन बाबत जल्दी कार्यवाही करल। कार्यक्रम मा हेंवल वाणी क अध्यक्ष रघुभाई जड़धारी केंद्र निदेशक राजेन्द्र नेगी, आरती बिष्ट, नगर पालिका अध्यक्ष सुमना रमोला, ब्लॉक प्रमुख शिवानी बिष्ट, प्रमुख राजेन्द्र भंडारी, शांति प्रसाद भट्ट, विजय जड़धारी, सोमवारी लाल सकलानी, शक्ति जोशी, यलमा सजवाण, सतवीर पुंडीर, आदि मौजूद रैन।
